堪輿大師蔡伯勵之子蔡爾雅，以一手上乘絹畫聞名，最近仲同東華三院合辦名為「氣韻生動才真似」慈善畫展，展出60幅個人珍藏，其中56幅仲會義賣，善款捐助貧苦大眾。蔡爾雅對中國傳統文化、佛學同堪輿學有研究，又曾經旅居歐洲30幾年，今次展出嘅作品均具中西兼容之貌，做到雅俗共賞。
畫展噚日起一連三日喺文化中心四樓展覽館舉行，噚日舉行剪綵儀式，蔡伯勵親自撐場支持。早排蔡老批算屬馬嘅CY蛇年有吉星「太陽正照晦氣全消」，但師承自佢嘅愛女蔡興華就唱反調，話狼英10年大運已過喎。蔡老解釋，阿女絕對唔係學藝未精，只係各人都有唔同見解同睇法，自己睇得長遠啲，阿女睇嘅係中短期，但一句到尾，香港一定有運行，「乜嘢都好」咁話喎。
