候任旅遊發展局主席林建岳除咗搞娛樂事業，仲有沾手飲食業，有幾間知名高級中菜、意菜同日本菜餐廳，新近喺灣仔開咗間主打蒸籠料理嘅日本餐廳，噚日華華同一位為食嘅上市公司老闆去食晏，順便探聽吓佢間公司因乜事有股價異動。
新餐廳總廚曾經喺日本一間米芝蓮三星懷石料理店工作，以日本廚師嘅執着，食物質素同服務應該拍得住五星級酒店裏面嘅日本餐廳。可惜唔知係咪午市關係，侍應嘅服務態度好一般，同高級日本料理店冇得比。
主打嘅蒸籠料理，用木製方形蒸籠，先喺底鋪上一層蔬菜，再喺上面放海鮮或肉類蒸煮，食法特別，薄切和牛確實嫩滑，但海鮮同蔬菜嘅口感就一般，驚喜欠奉。都說期望越大，失望越大，何況食呢回事，相當主觀。另一失望，就係同行呢位上市公司老闆啩住食，唔肯講正經嘢囉。