內地黑客入侵外國系統，早排成為焦點。籃球界有佐敦，高球界有活士，黑客界有Kevin Mitnick。Mitnick的銜頭，是前FBI頭號通緝犯，值不值，容後再講，但這個地位，絕不容易去到，尤其是不流血的罪案。Mitnick坐完監，過埋封口冷河期，上年終於出了自傳，講以前做過的大茶飯，馬上買了來看。
先講做案手法。平時睇劇，例如《24》，裏面的黑客，屁股長期黐住張凳，一收到柯打，馬上變成鍵盤戰士，猛㩒猛㩒，直到主角臨死前一刻，終於解開密碼，地球不用滅亡。稍為有點電腦常識，都知道好假，我肯定現實不是這麼一回事，但又想不到真實的操作。Mitnick的自傳，替我開估。
神偷出手 先要做功課
基本上，可以看成是偷。最強的神偷，就是穿得過重重關卡，然後帶着目標全身而退。但無論保安設計得如何精密，總有人為的組件，有人就有弱點，神偷不會這麼蠢，去破甚麼理論上1,000年都破不到的密碼，呃應呃的人，容易得手得多。
呃人，就要扮嘢。扮嘢，要搞清扮乜嘢，同埋點樣扮。按Mitnick所講，每一次出動，他做得最多的，是功課，包括鑽研目標公司的人物圖、關係圖、權力圖、地圖、系統圖，有時還會實地考察。對，黑客其實似《盜海豪情》多過似《24》。
以上講的各種「圖」，當然不是任你拿，是要你逐忽逐忽、一步一步、旁敲側擊摸出來，我只是聽Mitnick講，都講得好艱辛。這門學問，叫social engineering，我睇過入門的書，講到底，伎倆基本上跟呃阿婆話個仔出事要畀錢救，原理差不多。
所以，新聞說內地黑客，某某個案花成年半去入手，絕不出奇。中間有好多死路，此路不通，繞道再試，不通，再繞，這一門剝洋葱式的手藝，絕不是只能專注10分鐘的時下年輕人可以學得到。
講講心態。Mitnick做黑客，不是打工，不是為愛國，只為興趣。以前細個，睇新聞，有時會聽到，有小偷被捉，原來是有錢人，因為技癢，走去偷粒糖，我想不通那是甚麼心態。聽完Mitnick本書，我好似明多一點。Mitnick做案多次，從來冇賺過錢，出手原因只有一個，心癮，正如那位登山人名言：because it's there。
我信Mitnick的自道。就算後來FBI高調做他，所有的指控，都是說他「構成」風險，「可以」造成重大財物損傷，但冇證據說他實質謀利。
我同情Mitnick，不是說Mitnick沒有犯罪，但當時執法人員以大眾的恐懼及無知，把事情煲大好多倍，施以過嚴的懲罰，我信是事實，也認同是迫害。
睇完本自傳，腦中浮了個劇本的構思：一個天才宅男，平時怕怕醜醜，夜晚搖身一變，扮鬼扮馬做黑客，純粹自娛，越來越上癮，上得山多終被捉，不坐監的條件，是幫某政治勢力做案……當然，內地不准掂的題目，搵鬼投資。
宋漢生