香港機場博覽館前晚舉辦完「網球名將交鋒」表演賽，美國紐約同一日都舉行類似比賽，「卡士」仲勁好多，女子方面就有當今頭2球手「細威」莎蓮娜同艾莎倫嘉；男子就有前「1哥」拿度對09年美網冠軍迪樸度，呢場表演賽喺室內體育館度打，拿度輸6:7和4:6，講到尾都只係一場表演賽，勝負唔使太介懷。拿度打完後，隨即飛去加州，準備今日展開嘅印第安韋爾斯網賽，係佢自上年3月後嘅首場硬地賽。
世界排名第5嘅拿度上月腳傷好番復出後，連贏巴西同墨西哥兩項泥地賽，不過擊敗嘅對手唔算強。喺印第安韋爾斯網賽列為5號種籽嘅佢，8強極有機會硬撼迪祖、梅禮等世界排名前4球手。佢喺賽前就話自己健康已經正常番，「喺場上追波已再冇腳痛，不過打硬地賽會喺點，我就唔清楚，今次終於可以試試，係一件好事啦！」