有本地財經報紙刊載有關港星兩地財政預算案的專題報道，剛好自己前兩天也寫過一篇，所以格外留意。看完確實要好好思索一番，到底係我份人市儈低俗，定係真係有人可以不食人間煙火？文中提及去年本港財政雖然錄得巨額盈餘649億元，然超過一半330億元已撥作紓困用途，市民（中產）若要再從經濟發展成果中分一杯羹，實際上是否可行的疑問？
我只想講，呢幾年市民，無論基層又或中產（財爺嗰種例外），根本係分享唔到所謂「經濟發展成果」，薪酬扣除通脹因素，實際有減無增，低收入人士猶幸有最低工資而保底，其他只能眼白白看着生活向下流，財富增長只是富者獨享的玩意，因此我們能夠爭取的只有政府的「財政盈餘」。可惜今次分到最大粒糖嘅係往後可在監控以外，任使任用的關愛基金，加埋其他各式各樣嘅寬免，基層始終受惠最多，亦難怪中產失望。
講番人家新加坡，財政盈餘少一大截，得244億元，不過淨係一項「加薪補助」（見前文「派爆炸糖」）已預咗要使225億元，受惠者幾佔勞動人口七成，而低收入人士，仲另有「就業入息補助」，即係每月可享政府額外現金津貼。全部現兜兜，且要皆大歡喜，豈是一個「恨」字了得。為此該文努力解畫，提示港府收入主要來自地價、印花稅（加埋佔成46%喎），未有如新加坡有全民都要負擔的消費稅作補貼，所以沒理據仿效「通派」囉！
有份畀先派 點解要扶貧
我都冇理據，只識得一句：「認錢唔認人」，若然係有份畀先有份派，咁我哋點解要扶貧？弱勢又何能進貢庫房？大地產商，寡頭巨企賦納最多，咁係咪要回水濟富先？！若從公司立場出發，我舉腳贊成。不過話時話，星政府都係為咗吸引外企，與港看齊，十年前先將利得稅由22%大幅減至17%。然卻鮮有寬減以回饋商界的義舉，香港確是福地。至於港人唔係要捱天價「麵包」，政府又何來咁豐厚嘅「麵粉」稅收入？唔通「還富於民」這幾個字真係咁難明？
不過最難明嘅都係文章指「資助企業加薪，係干預市場，豈是港人樂見？」原來除咗啲膠官，仲有好多人係會思想膠着，睇怕所有勞工法例都干預緊勞動市場。當然今日我更察覺到自己嘅身份危機，因為我真係唔知篇文係要寫畀邊個「港人」睇？
盧先亞