最近民主黨檢視網站點擊率，勁升100倍！「之前每日只有幾百人睇，起點低嘛！」坦白得來不忘自嘲，是黎敬瑋的風格。說他是政壇新星，有點肉麻卻不為過。24歲，黨齡兩年，但已先後在區選及立法會選舉中做樁腳，新近更獲選為黨內新成立部門創意媒體部的部長，專責網絡改圖，主理「CY快落台」系列，為早已呈老態的民主黨重新包裝，「今時今日，唔打網絡戰唔得」。遲知遲覺，總好過無知無覺，初生之犢，就是夠勇。記者：呂麗嬋
民主黨的創意媒體部共有八名成員，年齡中位數都不過30，黎敬瑋更是最年輕的新任中委成員。因為實習而與民主黨結緣，這個大學時代搞開學生會的年輕黨員不諱言，入黨之年，正是多事之秋，「我喺城大讀政治及公共行政學系，2010年派咗去李永達辦事處做助理，畢業後順理成章留咗落嚟，嗰一年正值五區公投如火如荼，民主黨冇參與；又發生中聯辦密會風波，自此成為眾矢之的」。
朋友話上錯船叫退黨
壁壘分明，是今日的政治常態，黎直言為此與不少同路人分道揚鑣，「讀得政政，我身邊嘅朋友都好關心政制發展，好多朋友就鬧我，話我上錯船，叫我退黨。做街站又俾人鬧同掟嘢，話我哋出賣民主」。血氣方剛，和網友在討論區筆戰，他笑言是那時的每天工作！「黨高層採時間可證明一切嘅態度，罵不還口，但就我角度，時間只證明到唔反擊，只會喺網絡平台上不斷發酵，謊言都會變事實」。
深信搶佔輿論平台是硬道理，但畢竟人微言輕，黎直言只能靜待時機改革。2012年立法會選舉，民主黨被狙擊，「票債票償」的口號叫得響亮，當時所謂的創意媒體部仍未成立，但負責文宣的他與一眾求變的年輕黨友已蠢蠢欲動，「呼籲選民登記嘅海報，我哋用咗個爛蘋果，當時嘅構思係：就算你真係覺得我哋爛，請你也投出神聖一票，盡應盡的公民責任」。
「以毒攻毒」的設計有迴響，打下強心針，之後何俊仁參加特首選舉陪跑，他與其他黨友又想出食住《那些年》熱潮，找來靚女親友扮「土炮沈佳宜」，以低成本拍成宣傳片放上YouTube谷人氣，「呢套片係轉捩點，外界開始覺得民主黨冇咁老餅」。漸見成績，加上現實上民主黨在選舉得票上失利，黨內求變、調撥資源改革的聲音更響，創意媒體部應運而生。
「我哋破天荒請咗個全職設計師，好似近排嘅CY快落台系列、農曆年嘅應節精品等，甚至係民生議題，好似動物警察，我哋都設計咗四款名信片，每款只有動物頭，黨嘅標誌放到好細，唔想再好似以前咁，永遠只係一堆人頭加一堆字咁悶」。
有危先有機，黨內新近就全面檢視過網站的點擊率，由上年度每日600升到60,000。為谷網站人氣，媒體部又二次創作了一張卿姐瞪目提醒大家關燈的海報，夠晒霸氣。「卿姐好玩得，唔會嬲！好多人話民主黨大佬文化好嚴重，其實唔係……」連阿姐都敢玩，後生可畏！