「樂壇小強」阮民安又爆欠債風波，據知他欠何佩瑜（Jeana）前緋聞男友喇英（La Ying）父親五萬多元裝修費，又被星光幫張偉晉追討4,500元跳舞比賽獎金。被指孭住周身債的阮民安昨日反駁，強調自己擲近百萬元搞公司，怎知被喇英起飛腳，他說：「公司註冊冇我名，我點會仲畀裝修費！」
昨日Bro5成員喇英和星光幫張偉晉齊向本報記者表示前組合E-Kids成員阮民安（Tommy）欠錢不還，喇英昨日接受電話訪問時說：「我同Tommy識咗好耐，三年前我哋同一個朋友合作搞studio，我爸爸以前做裝修，搵人幫我哋裝修，每人夾五、六萬，但Tommy一直冇畀。」
喇英追裝修費
喇英稱裝修費由爸爸代墊，由於是老人家棺材本，他一直追Tommy還錢不果，喇英說：「前年我同爸爸去搵小額錢債審裁處，但法庭話搵唔到Tommy追唔番數，我打電話畀佢又唔聽，惟有當自己遇人不淑，後來知佢欠人好多錢，對佢好失望，長痛不如短痛，結束埋studio，蝕咗幾十萬。」
而曾參加亞視《亞洲星光大道5跳舞吧！》獲第四名、去年跟亞視簽約的張偉晉，昨日亦指Tommy欠錢，他接受電話訪問說：「09年佢間公司搞舞蹈比賽，我攞季軍有4,500蚊獎金，但佢拖到𠵱家冇畀，佢都冇接電話，我諗過去小額錢債審裁處告佢，但冇佢地址冇得告。」
Tommy大前日才在南京機場死纏韓國人氣偶像G-DRAGON合照，昨日他已飛日本開會，他接受電話訪問反駁：「嗰時搞跳舞比賽，完騷後我離開咗公司，我負責嘅一半獎金已經畀咗，唔關我事，叫佢搵我以前嘅拍檔。」原來Tommy口中的拍檔就是喇英，當他知道喇英指他欠裝修費，即激氣說：「呢個又搞笑，當時大家合作搞公司，點知公司註冊冇我名，得佢同佢女友名，我畀咗近七位數投資，仲以為自己係老闆，之後佢仲簽咗周秀娜經理人間公司起我飛腳，點會仲畀裝修費！」
採訪：丁寧
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/