任達華夫婦喺個廣告入面話，做人要work hard、play hard；而前英超球星魯鐸克則認為，要加埋drink hard至得。不過呢位身形暴脹嘅利物浦名宿就戥C朗等球星辛苦，話佢哋為咗形象同身材，唔敢去酒吧大飲特飲，過唔到球星應該過嘅生活。
喺利記唔劈酒唔使踢
「𠵱家啲球星個個星期執成十幾廿萬（鎊），搵多過我哋嗰代好多，但就唔似我哋咁，鍾意點使就點使。」現年44歲、肥到好似豬咁嘅魯鐸克，喺接受英國男性雜誌《Loaded》時憶述：「C朗班球星唔好似我哋咁去酒吧或夜總會，飲到啤啤夫。我哋不嬲有飲酒文化，特別係喺利物浦；如果你唔飲，你就唔可能喺利物浦踢波。每逢禮拜二我哋拉隊飲酒，而且劈到斷片，咁樣先至可以加深隊友之間嘅感情。」
魯鐸克補充：「𠵱家啲球星太有紀律。我出去飲酒，至少飲半個品脫；𠵱家啲球星怕俾人見到，所以會好節制，但我就一定唔會。我嘅座右銘係train hard、play hard、drink hard。無論贏和輸，我都會喪飲。我嘅原則係比賽前兩日唔飲，就係咁簡單。」
講真，唔係個個球星都咁自制，好似曼城班球星咪成日去飲酒囉。皇馬嘅C朗要keep住嗰兩塊雞扒同8嚿朱古力，當然唔可以將酒當水飲，否則每日做6,000下sit-up都補唔番；更何況佢孭住幾千萬鎊嘅廣告合約，形象受損隨時見財化水，梗係唔可以好似幾年前咁亂嚟啦。巴塞球星美斯自爆話自己好悶，喺唔踢波嘅日子就係打機、湊仔同瞓覺；佢若然唔係背負世界金球獎呢個名，話唔埋會好似魯鐸克咁放縱。