兩會期間，本港重量級政、商界人士雲集北京，開會其次，開餐好重要，因為中國人愛在飯桌談政治，八方聽聞，京城有幾處地方，都係港區政協同人大代表開飯熱點；食物質素各有所好，有feel就腳先最緊要。唔知中央領導厲行節約下，今屆政治飯局數目有冇大減呢？
東方君悅長安壹號
人均消費：約¥200至¥300
【勝在就腳】
五星級嘅東方君悅大酒店，入面嘅長安壹號餐廳據聞有唔少政協捧場客，好似張華峯同林大輝等都曾喺呢度宴客。呢間中餐廳以北京烤鴨為賣點，價錢唔算平，唔驚俾人話唔夠節約咩？大輝原來有苦衷，佢話香港記者主要喺北京飯店打躉，兩間酒店都座落東長安街，梗係要揀個對記者最就腳嘅地點，相信因此亦令呢間餐廳有唔少人捧場。不過佢話其實比較鍾意去抵食嘅四合院。據講如果普普通通食餐午飯，位位200至300蚊都可以落樓。
北京香港馬會會所
人均消費：約¥300至¥500
【私隱度夠】
好多港區政協同人大委員都話呀，北京馬會會所兩間中餐廳「幸運閣」同「凱旋」，食品質素未算頂呱呱，但點解仲有咁多人喺度設宴請客？原因之一係夠私隱，可以喺餐廳內嘅私人宴會廳同人把酒談心，傾國家大事又得、同記者吹水八卦亦都得，相傳唔少人都喺馬會會所飲到腳浮浮先走人。
范徐麗泰係馬會董事，唔知會唔會去捧場；香港馬會會所幸運閣人均消費約300至500蚊，睇怕北京都所差無幾。
三里屯 麵（Noodle Bar）
人均消費：約¥25至¥100
【潮氣十足】
新人事、新作風，今屆由文化界別轉會至特邀港區組別做政協委員嘅候任旅發局主席林建岳，開餐地方亦令人耳目一新。話說岳少同一班經民聯成員，稍後約傳媒去三里屯一間人氣麵館「麵（Noodle Bar）」消夜。而呢間小店嘅賣點，查實係有好多北京潮人以及音樂人打躉；據聞岳少同部份經民聯成員，已經率先試菜，覺得唔錯，而且埋單唔計豪飲，位位100蚊應該有找，所以值得同傳媒試試。佢哋拉大隊捧場後，可能變埋生招牌㖭呀。
mailto:[email protected]