香港有「黃鋁罐、藍廢紙、啡膠樽」垃圾分類，美國連銷零售商J.C. Penney就整個「紅裁走、黃忟水、綠留低」嘅員工分類計劃。查實公司裁員，叫部門阿頭交人咪得囉，使乜整色整水令到人心惶惶？裁走嗰批仲好啲，忟水嗰班員工肯定心裏難受，搵定後路。
J.C. Penney行政總裁約翰遜2011年上場以來，已經炒咗1.9萬人。有高層爆料，話幾個月前收到裁員指令，要佢哋將同事分為三個顏色級別，分完之後，要話番畀員工知，等留低嗰班作出改善。
呢間公司啱啱公佈第四季虧損5.5億美金（約43億港元)，差過預期，繼續裁員幫唔幫到改善業績係未知數，但咁嘅分類裁員計劃，肯定拖低士氣。