強國人開始對振英禁運奶粉反彈，如此笨實政策，政務官早已睇死實出事，𠵱家奶粉商化罐為盒，一於提供散裝貨，放入背囊已輕鬆過關。成件事搞到咁騎呢，同振英房策如出一轍；政客為追逐短期民意，「成熟一招出一招」，冇考慮政策合理性，總之就do something，結果每出一招，成效不彰，反而推高民眾期望，在民情洶湧下，惟有再升呢，又出另一招。過往政務官出招前，往往反覆辯論是否good policy， 當中有幾個量度標準，包括可行性、會否產生界外效應及副作用，影響其他政策。
政策玩花招 扮做嘢
振英決策有一個模式，就係政治掛帥，愛玩花招。如房策本來就冇短期良方，但在do something心態下，將置安心變成全數出售，又推出白表免補地價買居屋安排，主動推高對資助房屋需求。土地供應根本冇短期良方，陳茂波就走出來煞有介事宣佈取消勾地表，宣稱由政府奪回土地供應主導權，誤導巿民以顯示政府已做嘢。
至於所謂「奶荒」，實際上只係某幾隻大賣廣告奶粉牌子與水貨客，人為製造出來的短缺現象，並非冇奶粉賣，政府在扮做嘢心態下，先動用警方高調掃上水貨倉，以為做兩三次show就搞掂，結果令水客全港出現。正本清源方式是增加供應，包括由政府母嬰健康院供應奶粉，根本毋須限制出口。
奶荒根源係本地及珠三角父母盲目相信奶粉廣告，認為食咗某幾隻牌子會IQ爆炸，滿口英文，勁過林沛理，兼直升大學，連啲屎都靚過人，睇見都眼火爆。大家打開電視，由無綫到有線，黃金時段奶粉廣告不斷播放，作洗腦式轟炸。
據講張學友個細路滿口英文坐氣球奶粉廣告，在珠三角播咗成年，已將家長洗晒腦。食衞局局長高永文身為醫生，根本知道BB食乜嘅牌子奶粉都得，除少數腸胃敏感外，BB中途轉奶粉亦無問題，所謂高IQ全部係添加劑。可恨之處是連醫生出身的問責官員，也置常識理性不顧，以民粹方式搞「港人港奶」，一齊發癲。
上屆局長周一嶽，公關手腕或者比不上高永文，但其處事及決策，比高永文大氣得多，劣幣驅逐良幣又一例證。
添馬男