以零收視聞名嘅亞視苟延殘喘，唔少港人都希望亞視快啲摺埋；而前日亞視網頁突然down咗，就振奮整個網絡界，人人群起歡呼，仲不斷轉載亞視down咗嘅電腦畫面，覺得呢個係亞視死亡前嘅徵兆，有人仲陰謀論話亞視主要投資者冇連任全國政協，亞視收檔在望。但點知事隔唔夠24小時，亞視網頁晏晝突然復活，令好多人空歡喜一場。
網民歡呼「好行唔送」
亞視網頁前日傳出「死訊」，網民拍枱高呼，「我最期待的終於出現！」、「熱烈地彈琴熱烈地唱」、「好行唔送」、「明知冇人會睇，索性網頁都唔整，慳番筆」，回應可謂尖酸刻薄到冇朋友，有人甚至推測亞視節目上周因被判違規重罰後，亞視冇錢搞網頁：「罰完26萬之後，冇錢租server？」總之網民清一色只有掌聲，沒有哀聲。
但歡呼聲只維持咗不足一日。亞視公關噚日話網頁只係因為技術問題down咗，噚日晏晝宣佈網頁復活重生，網上頓時一片哀鴻遍野，個個想亞視摺埋嘅網民大失所望，有網民話要結束慶祝活動，差在冇發文寸爆亞視。
向來以與內地關係良好自居嘅亞視，佢嘅主要投資者王征已經未能連任全國政協，唔知亞視仲可以玩幾耐？八方聽聞免費電視牌照有冇着落，都視乎TVB嚟緊就政府發牌嘅司法覆核，但當然最後發落人都係梁振英，事關發牌問題已經好政治化。
mailto:[email protected]