前亞視新聞主播繆美詩開公關公司已兩年半，除咗發展事業，仲積極同老公造人，大囡𠵱家歲半，細囡仲有幾日就出世，真係可喜可賀。
繆美詩最近夥同教育局前新聞秘書Timothy，幫職訓局VTC才晉高等教育學院做公關，腹大便便嘅佢噚日仲照樣開工，出席傳媒飯局，認真勤力，仲話𠵱家脹咗成個碼。
傳媒人搞公關活動，都鍾意搵行內人幫手，佢哋搵咗無綫前主播柳俊江，聯同《頭條新聞》曾志豪，喺今個月23號嘅才晉學院入學資訊日教講嘢技巧，柳爺同小豪子呢對拍檔應會爆好多「語言偽術」，有興趣嘅話，當日下晝兩點半到IVE調景嶺知專設計學院聽吓啦。