最近唔少人話本港新春銷售旺場，但另一邊廂，賣衫褲鞋物嘅零售商似乎被暖冬玩殘，斯人獨憔悴。百麗（1880）旗下嘅「Staccato」、「Millie's」等品牌，店內起碼仲有近一半秋冬貨，全線做緊三折。至於出現存貨問題超過一年嘅I.T（999）就仲恐怖，不停派coupon鼓勵你重複消費不特止，最新又嚟多轉全線分店低至一折大清貨，再加買四送一。入面堆衫海，個架啲衫多到係你推都推唔郁。
同為零售行家的一名上市公司高管話，今年冬天凍的日子太少，對賣衫來講本來就唔着數，加上市場近年競爭者多咗好多，消費者太多選擇。他說，以往好景時，一過完農曆新年幾日，I.T就已經換晒季，百麗亦都唔會遲好多，點會好似𠵱家咁，仲清緊冬裝？呢個景況，只有08年金融海嘯後那個冬季出現過，他個人感到有點憂慮。
海迪唔覺得整體消費市場氣氛太差，只是當自由行出現結構性改變，增長回復new normal水平時，行業即出現嚴重兩極化現象。觀乎最新零售數據，只有化妝品、電子產品表現可持續強勁，其他項目幾乎都乏善可陳。咁樣嘅市況，能算健康嗎？
海迪