台灣最近報道指日日做嘢冇停手，茶同咖啡不離手，連做運動都話冇時間嘅女仔，好易因骨質流失而拗柴。其實女仔更應該多飲水同做運動，皮膚靚啲，身型又fit啲，買套靚靚嘅運動衫落街跑吓步，不知幾爽。
提到運動衫，Nike係其中一個香港人至愛品牌，不過公司近來業績認真麻麻。你以為一向當國際品牌係寶嘅強國人可以撐起Nike？咁你就錯啦。查實近年一直將內地體育品牌打殘嘅高庫存問題，一樣困擾Nike。最新有報道話，佢會於今年內喪開40至50間散貨場，以三至四折劈價清庫存，反映世界一線大brand，喺強國都做唔住，更何況係強國土產品牌呢？
最慘嘅係，Nike講到明要去二三線城市開特賣場，擺明入侵強國土產品牌散貨地頭。問心，Nike波鞋賣幾百蚊，李寧（2331）波鞋當賣平一半，唔好講話虛榮心，單講產品質素，唔買Nike都對唔住自己啦。面對咁強嘅對手，體育用品股想翻身，睇怕難上加難。
Fifi
本欄逢周二、四刊出