憑聲線成名、現年65歲的謝月美在風光時先後生意及婚姻失敗，人生打擊並未令她氣餒，反而明白做人最緊要接受失敗才能重新出發。加入娛樂圈40多年，她深明成敗得失不由自主，從沒期望別人認識，唯一堅持做戲夢想，如今王維基令她實現夢想。
撰文：卓寶花
在60年代尾開始，科技尚未成熟，不少影視作品沒有現場收音，配音員大有巿場價值，當時大部份作品都有着一把熟悉的聲音，來自現年65歲的謝月美（May姐），她除了參與影、視、舞台劇演出外，經歷人生高低起跌，還記得初時加入無綫配音組，謝月美以為可以雙管齊下邊配音邊拍劇，但有日上司大發雷霆說：「配音就唔可以拍劇，消息一傳出去，啲人就唔敢搵我。」
謝月美從小到大的夢想是演戲，但意想不到配音成為了她的終身職業：「以前讀藝訓班有跳舞、配音、演戲、唱歌等，返足一年，學費廿蚊一個月，當時出嚟打工，人工二百幾蚊一個月，唔似𠵱家有車馬費。」
謝月美67年加入麗的呼聲，其後適逢無綫開台，大量招攬人手，她轉投無綫配音組，演戲夢突然破碎，但可觀收入成為最大推動，她說：「當時配音搵到錢，配音半小時280元，藝人半小時當一個騷得400元，做配音淨坐，運用把聲，從三歲到八十歲聲線都可以做到，藝人上鏡好多額外嘢要顧及，相對我係咪好好搵先。」
移民人財兩空
漸漸配音成為謝月美主要收入來源，70年代她先後在無綫和佳視工作，人稱她「謝七千」，她說：「當時半個月薪金七千，放工仲可以做電影配音，我個年代五千蚊已經可以做首期，𠵱家冇呢個人工啦。」
當年與前夫，同是影視劇團成員盧國雄夫唱婦隨，賺夠儲備後，謝月美與丈夫放棄香港事業移民海外，但好景不常，她說：「移民後我哋做錄影帶生意，冇耐蝕清光二百幾萬，一家人返香港重頭開始，移民前香港三分一影、視配音都落喺我手，走咗乜嘢都冇晒，要重新建立，返到香港冇幾耐同丈夫都分開咗，要獨力帶住三個仔女，生活艱難。」88年左右謝月美返港再續配音緣，經歷時代變遷，配音行業開始低落：「返嚟時差距好大，個行業唔值錢，亦冇人尊重，搵人配音都要搵個明星，仲要多人識先有人用。」
回流後由零開始，再開辦配音室，累積收入和經驗，其間配音、舞台劇、拍劇樣樣撈，也曾加入無綫做藝員五年，她說：「當時做所謂甘草演員，機會好被動，以前一、二、三線演員都有父母角色，𠵱家得主線有，醒你唔起就冇機會，只係久不久做婦女甲乙，錢都勉強，主要唔係我想做嘅嘢。」謝月美再另覓出路，幾經努力才再站穩陣腳，子女成長亦令她可以暫時拋下擔子。
簽王維基圓夢
王維基開創香港電視，令很多有志在演藝事業上發展的藝人理想再現，謝月美機緣巧合下投向王維基旗下，有份擔演《客家女人》中一個橫跨幾十年的角色，戲份頗重，與過往路人甲乙有異，將藏在心底幾十年夢想成真：「不過我唔介意行出嚟人哋影唔影我，或識唔識我，因為我只係一個演員，唔係一個明星，我做呢行咁耐，覺得呢行冇話紅係大不了，唔紅就差，我只視為一份職業。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/