咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
今日想講兩場波，首先預示今晚曼聯對皇馬嘅大戰。首回合，曼聯屯重兵右路，將C朗嘅威力減到最低，但令到左路空位較多，所以皇馬右翼迪馬利亞好活躍。用兵之道，正奇相合，如果今晚兩軍對弈嘅主要戰場都係曼聯嘅右路的話，曼聯嘅左路就係奇兵決勝嘅關鍵。
今場比比復出，加上華拉尼表現好，皇馬或者派沙治奧拉莫斯踢番右閘，佢嘅助攻能力勁過艾比路亞好多，相信可以同迪馬利亞狂攻曼聯左路。如果曼聯左翼用香川真司、傑斯或者朗尼，佢哋3個鍾意走去中間踢波，加上防中偏向看管另一邊嘅C朗，所以拉莫斯將會冇人睇；如果用勤力嘅韋碧克或艾舒利楊格方可克制拉莫斯。
之後就講周日晚嘅北倫敦打吡，小弟發現阿仙奴陣中有位仁兄表現水準之下，佢就係阿迪達。呢位西班牙中場大腦今季聯賽場均傳球85.6次，成功率92.4%，但佢今場呢兩項數據都大失準。雖然阿迪達喺77分鐘被換出，但佢今場只係傳咗59球，少過平均數廿幾次，而成功率亦跌到85%。作為兵工廠嘅發電機，阿迪達突然跌watt很可能係今場球隊組織能力偏弱嘅原因。此外，前鋒基奧特嘅傳球能力弱都係問題。縱觀全季，佢嘅傳球成功率得64%，排全隊尾2，而佢今場嘅成功率仲跌到落46%，令到唔少攻勢都喺佢身上斷纜。文：咖喱