鬍鬚曾的一句「我都係中產」，錯有錯着，成功將傳媒矛頭轉移，加上梁粉搶風頭，陳茂波在預算案翌日就開記者會宣佈取消勾地表政策，聲稱政府要奪回賣地主導權。嘩！好似好有型，令財爺與梁粉不和之說甚囂麈上，中產又開始同情番鬍鬚曾。
坦白講，今時今日在政府內稍為正常之政務官，有邊個會對梁粉局長睇得順眼。政務官唔憎恨左或右之政客，最憎係抽水行為，做事鬼祟。而陳茂波取消勾地表政策，正正就係此類鬼祟行為，新政策與建立政府掌控土地供應完全無關。
本來勾地表制度同定期賣地並行，所謂勾地表主動權根本掌握在地政官員之手，發展商想勾出某幅地，要「到價」先可勾出再拍賣，而拍賣中冇人出高過此價，勾地之發展商便要食咗佢。好多人唔明梁振英為何取消勾地表博一日掌聲，而將政府手上調控地價工具廢棄。
走回八萬五舊路
其實取消勾地制度只有一個真正目的，就係重回八萬五第一步，政府不斷推出土地定期拍賣，越拍越低，甚至流拍，以此打擊市民對後巿信心，用賣地來質低樓價，從而調控樓市。對政客而言，打擊樓市是政治需要，但對政務官而言，樓市不要大起大落，平穩才重要。
雙方過去大半年已就此不斷角力，經歷八萬五之公務員，知道樓市唔會跟隨長官意志舞高弄低，八萬五之錯，在於建屋指標一旦訂立，便盲目不顧後果地推地，亞洲金融風暴冧市後也唔肯煞停，推地推到人人仆街為止。八萬五絕對係人禍，而並非天災。
過去大半年房策亂出招，催谷大量原本不存在的資助房屋需求，如單身年輕人，梁振英根本搞唔掂。佢本人又吹大咗，低估造地及增加供應困難，令自己陷入無能指控。要交單惟有一個方法，就係隊冧私人樓市，降低置業需求。以佢剛愎自用施政風格，一定會走回八萬五舊路。
長實（001）分拆酒店出售，係聞到𤓓味先至有乜賣乜，超人永遠比人走快一步，前財爺梁錦松警告小心八萬五再臨，現任財爺又對取消勾地表不以為然，消極對抗。
今勻大家真係要睇車！
添馬男