咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
「女影評家」批評港產片《低俗喜劇》獲獎，原本站在評審角度，每部電影都總有好與壞，而且香港嘅核心價值，就係言論自由，「真小姐」佢想點講都冇大問題，惟獨呢位小姐越描越黑，講自己事後飽受批評，係因為佢屬大陸人呢個身份，為佢帶來原罪。
其實「真小姐」同賓尼迪斯都有幾分似；賓帥呢排又自爆，講明今季結束後唔會再帶車仔，其實以車仔呢排成績，佢根本冇希望博到長約，今次只係佢想扮型，先飛車仔，唔好等車仔飛佢。賓帥仲爆得不到球迷嘅祝福，因為佢係前利物浦領隊呢個「原罪」身份。無錯，佢出任紅軍領隊時期，經常喺歐聯同英超同車仔燦爛大戰，仲互有勝負。不過車迷何曾視紅軍為死敵？球迷總係現實，如果賓帥上任後帶隊先贏世冠盃，聯賽又連勝，球迷又點會理佢邊度出身。歸根究柢賓帥被車迷唾棄，係因為佢嘅不濟。
不過小弟也不得不讚車仔球員嘅專業；對住呢個「情緒、思維」有問題嘅領隊，都仲保持拼搏態度，上周六主場小勝西布朗1:0，運氣好啲可贏多幾球。但車仔嘅第3位已被熱刺搶走，又要面對阿仙奴、愛華頓等挑戰第4位，車仔球員恐怕又要自動波。
忽發奇想，「真小姐」其實可以去倫敦，接替賓帥做車路士領隊，或者車迷擔心呢位小姐可能對足球毫無了解，但做車仔領隊最重要唔係足球知識，而係聽話，識順從主子意思，「真小姐」呢方面功夫，不比賓帥差。文：牽牛