24歲賭王三房長女何超雲昨日宣傳護膚品，表示不抗拒入娛樂圈，但沒興趣像男友陳山聰般拍電視劇，只想做時尚工作。她透露賭王跟山聰都送首飾做生日禮物，大小不拘，心意最緊要。
何超雲、黎芷珊和黃佩霞等昨日在鰂魚涌出席護膚品活動，超雲之前為品牌拍廣告的酬勞捐予東華三院。她直認拍廣告有趣：「都幾好玩，拍咗幾個鐘頭。」陳山聰教路？她說：「好多人都有教，都幾滿意，都有問吓助手意見。」她指因媽咪、三太陳婉珍明年做東華主席，想盡量幫手多做善事，但未知會否做總理。
「冇興趣喎！」
由賭王女兒，到跟陳山聰拍拖，超雲長期佔據娛樂版面，現在更如藝人明星拍廣告，問她可是想在娛圈發展？她說：「我從來唔抗拒，只係少接觸啫。」想做模特兒？她說：「唔一定，但可以好多方面。」有興趣拍電視劇？她聽完有點不屑：「冇興趣喎，fashion就係最大興趣。」
提到早前24歲生日食飯，山聰被爆沒得坐主家席，超雲說：「好少人咋喎，得兩枱，我同爹哋媽咪坐，嗰日爹哋本來想休息唔嚟，點知都嚟到，真係好surprise。」她指其後有與男友二人世界慶生，賭王喜歡送樓給子女做禮物，問她有否收到？她說：「今次送首飾，爹哋鍾意送。」
收禮講心意
超雲指男友也送首飾，大小不拘，心意最緊要。山聰和她拍拖兩年來，全職陪女友，問她山聰到底做甚麼工作？她即說：「你哋自己問番佢。」只否認有傳兩人合資搞男裝。
同場鄭中基太太余思敏透露正為19個月大的囡囡搵學校：「要去學校interview，老師話佢講到一句完整句子都幾叻，可能我之前做主持，Ronald又鍾意講嘢，少少天份啦。」
採訪：顏英儀
攝影：林德雄
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/