資源從不匱乏嘅民建聯，家下連「派嘢」都電子化。噚日民主黨副主席羅健熙登咗一張民建聯鍾樹根派畀街坊嘅鎖匙扣相片，原來呢個匙扣唔簡單，除咗有Tree根嘅尊容貼紙喺上面外，只要將個匙扣「嘟一嘟」，就可以留下紀錄，邊個攞咗蛇齋餅糭都無所遁形。
Tree根同八方講，為數500個電子匙扣係黃容根送畀佢嘅，佢再轉送畀街坊，等南區辦事處同事可以知道街坊攞嘢嘅紀錄，唔會一人攞兩份，而呢個high tech嘢只係喺鴨脷洲用緊。
民主黨羅健熙就話，呢個匙扣係民建聯一個好強大嘅資料庫，可以統計街坊嘅喜好同埋背景資料，要睇吓點樣可以學習學習。