曾俊華在預算案提出設立獎學金基金，每年送二十名尖子學生到「海外知名大學」讀書，畢業後一定要返香港做教師，至少教兩年。
曾司長點解有此構思？據接近曾司長嘅人講，曾司長最近常提及美國「長春藤學生」志願做教師，回饋美國社會，可能受此啟發，故此有上述新意！
查曾司長在MIT讀建築，在哈佛讀公共行政，兩者皆一級「海外知名學府」也，美國有一個Teach for America（簡稱TFA）機構，係非牟利組織，專責招攬美國知名大學優秀畢業生或專業人士為教師，到低收入社區做教師兩年，希望藉此消除教育不平等（背後假設係窮區窮人吸引唔到優秀教師）。此組織在1989年成立，意念來自一位普林斯頓學生Wendy Kopp嘅畢業論文，在2012年，該機構收到48000份申請書，招聘咗5,800名教師，在46個地區任教，可說非常成功，但亦有不快個案嘅，2009年時就有報導話一位哈佛女畢業生中途退出，除咗薪水低之外，仲因為美國教師冇乜地位，不受尊重。
曾司長如果真的從TFA找到靈感，希望佢諗真啲，香港教師嘅薪水與地位，相對而言，高於美國教師，好教師好受社會尊重，香港亦未出現過窮人窮區缺乏優質老師嘅現象，只會出現直資學校、國際學校、傳統名校因名氣關係，似乎係佢地嘅教師質素最高嘅印象，我地有好多地區名校嘅啫。TFA經驗可否在香港重現，大家可以討論，但曾司長肯撥出4.8億元成立獎學金基金送優秀學生出外而不是進入本地大學，點都係令本地教育界人士「不爽」㗎嘞。以前曾蔭權曾經講過，不如將啲錢送香港學生入哈佛耶魯，勝於津貼佢地在本港讀大學，引來譁然之聲。現在香港嘅大學嘅世界排名相當唔錯，曾司長竟然暗示海外知名大學教育有助提高本地教育質素，試問高等教育界點啃？冇法啦，曾司長與財經事務及庫務局長陳家強教授都未曾在本港讀大學，兩人皆是美國知名大學畢業生，對美國名牌大學教育更有信心喎。