自西片引入香港，為電影改中文名就成為一門學問。角川洲際集團主席黎筱娉從事外語片發行超過40年，經手改名的電影超過一千部。她覺得文藝片的片名最難改，《天地一沙鷗》（Jonathan Livingston Seagull）、《濃情朱古力》（Like Water For Chocolate）等形意俱在的片名便是出自她手筆。《愛美麗》和《虎膽》等系列相對沒難度，單是名字已喚起觀眾入場衝動，但一齣 《凶線》（Blow Out）就讓她體會到「最怕改壞名」的真理。
撰文：何永寧
角川洲際集團的主席黎筱娉跟兩位同事日前接受本報記者訪問，一起向記者講解一部外語片由引入到戲院上映的過程，當中改名牽涉非常的過程，成功感不下於買入一部賣座電影。行內人尊稱黎筱娉為黎姑娘，自69年創立公司從事外語片在香港發行的工作，她說：「由片商買入一部片就開始要諗點發行同宣傳套片，要宣傳就要有中文片名。以前唔似𠵱家可以上網睇電影資料、口碑同片段，所以個名好重要，要觀眾睇就要話畀佢知套片講乜，仲要吸引到佢哋入場。最貼題係70年代改咗一套《天地一沙鷗》，成套戲都冇對白淨係講藍天白雲同隻海鷗，因為真係拍得好靚，入場睇嘅觀眾都好滿意。」
文藝電影考功夫
黎姑娘記得當年公司規模小，每日完成工作後，要等放工後才跟同事圍埋度片名，她說：「嗰時都係你一句我一句『腦震盪』，好多好片名《孤雛血淚》（Sorrowful Orphans）、《霹靂舞》（Break Dance）都係咁度出嚟，其中仲因為套片興起過一輪霹靂舞熱潮。」
黎姑娘自言當時滿足感好大，因為得到觀眾認同。替過千部電影改名，她跟工作團隊都不約而同認為文藝電影最難起名，特別是今日的社會，她說：「你起得文藝唔好話啲人唔明，聽見個名都未必想睇，又要引起佢哋興趣又要有詩意，真係好考功夫，你知𠵱家主要入場睇戲嗰班係25歲打後嘅後生仔，太深嘅名佢哋唔明，動作片同笑片都會易諗啲。有時有好多同名電影已經可以話係掛咗鈎，好似『驕陽』就自然諗起教書同勵志、動作片都離唔開用『轟』、『龍虎』呢類字、愛情片用『緣』，都係睇創作人嘅想法。有啲系列電影就較易改，好似《虎膽龍威》（Die Hard）、《第一滴血》（First Blood），用番沿用嘅名可以recall返觀眾記憶，呢類片都係因為票房好所以開續集。」
朋輩用語添親切
近年黎姑娘全心公益事業，行政工作已經放手給屬下團隊，改名的重任就落在Wing及Grace身上。改名的過程公開，遇到有舉棋不定的時候會以投票決定，Wing說：「黎姑娘教改名要貼緊我哋目標觀眾嘅用語，盡量用番佢哋朋輩間嘅用語，等佢哋聽起嚟親切感，食字就最普遍因為有hidden meaning（隱藏意思），相對易用所以會發覺好多戲名都係呢個方向。有啲字係歷久常新，有啲字係因為嗰排興，之後又好少用。好似早兩年柯德莉塔圖（Audrey Tautou）套《天使愛美麗》（Amelie From Montmartre）收得，差不多有佢嘅戲都叫『愛美麗』，都係希望食番個名。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/