台灣女星伊能靜自從同庾澄慶離婚之後，不時俾人影到佢同異性約會，早排就傳佢撻着《山楂樹之戀》嘅竇驍。近日伊能靜因為撐內地周報《南方周末》而傳俾內地封殺，仲俾人封為「公知女神」，有指佢即時成為唔少帥哥型男嘅追求對象。
日前佢喺北京又俾人影到同男女友人飯聚，食完晚飯佢哋成班人結伴離開，着住厚厚裝束嘅伊能靜全程春風滿臉，仲同一個30歲左右嘅男伴特別投契，兩人表現親密，沿途有傾有講，伊能靜亦小鳥依人咁主動蹺住對方手臂，之後佢哋轉戰夜店玩樂，逗留兩個幾鐘，大約喺凌晨三點，半帶醉意嘅伊能靜俾男伴好貼心咁扶佢上車，男伴離開前一再吩咐司機，之後目送伊能靜離開後又返入面夜店。
素顏陪小哈利
對於傳出新戀情，伊能靜噚日喺微博否認，解釋對方只係佢經理人，佢寫話：「本來滿心期待我的跛馬王子出現了？只是俺不知道？結果一看居然是經紀人洪茗暉！」
大前晚伊能靜同佢囝囝小哈利喺台北信義誠品逛書店親子樂，為怕俾人認出，伊能靜刻意素顏戴帽遮臉，兩母子仲坐喺地下齊齊研究手機科技書，真係好鬼溫馨。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/