除咗同股神畢菲特食飯有價，對沖基金見企業CEO、CFO都有價！英國《金融時報》近日踢爆，某啲投行運用客戶網絡，收錢安排對沖基金同知名企業嘅管理層會面。
「被賣鐘」不知情
呢種服務喺歐美幾普遍，亞洲亦開始興，唔同級數嘅管理層有唔同價錢，通常CEO一粒鐘2萬美金（約15.6萬港元），CFO就收1.5萬美金（約11.7萬港元）。最搞鬼係，呢班高層未必知道自己「被賣鐘」。
諗真啲，呢類會面其實充滿矛盾。企業管理層見基金經理，一般梗係想對方買入公司股份，但對沖基金最鍾意沽嘢，管理層畀時間同佢哋傾偈，轉頭可能被對方沽到飛起。得益嘅始終係投行，無論基金買定賣，佢哋都收到佣金，安排呢類會面又有錢收，認真好賺。