白鴿黨上周五搞春茗，順便為買新會址籌款，結果呢場春茗變成白鴿版「歡樂滿東華懷舊卡拉之星夜」。負責籌款嘅肥仔明，本身好鍾意唱K，屋企睡房都變埋K房，上場唱咗首蔡楓華嘅《倩影》，籌到1.5萬。輪到黃成智高歌關正傑嘅《雪中情》，全場時光倒流三十年；懷舊金曲浪接浪，有街坊夾咗3,000蚊，畀羅致光唱咗首六十年代嘅英文歌，但見羅致光念念有詞，台下卻冇乜嘢迴響，難怪肥仔明講笑叫佢喺關愛基金調動一億過嚟好過！最有水準係胡志偉夫婦上台唱《我和春天有個約會》。
主席卿姐當然成為焦點，成智同肥仔明膽敢話「阿姐」好難先開金口唱歌㗎，起碼要籌10萬；結果有神秘人出15萬要卿姐唱《何日君再來》，結果卿姐帶住黃碧雲同陳樹英班姊妹上台，唱咗首葉麗儀嘅《上海灘》，神秘人最後仲加碼5萬，成晚籌到30萬算係咁。卿姐仲澄清，民主黨中委會上周就佔領中環立場所通過嘅係「共識」而唔係「決議」，事關民主黨員最終是否參加，要交由全體會員大會同黨員自行決定。