講開高層離職，行政會議成員張震遠擔任主席嘅香港商品交易所，早排都有人事變動，算係開國功臣嘅何振民（Jimmy）原來已經低調離職。
Jimmy曾經喺期交所任職高層，期交所同聯交所合併之後，冇耐佢就離職，幾年前加入商交所做首席營運總裁，舊年低調轉為顧問，之後走埋。聽聞佢想搞基金，幾個月後可能有新動向。
市場一直關注商交所嘅發展，尤其係港交所（388）買起倫敦金屬交易所（LME）之後，商交所嘅發展空間成疑。不過，張震遠今年初先講，董事會同股東批准商交所配股1億美金，本月底前完成，商交所將來嘅發展，到時就可以得到確定。照咁講，大家即管等吓啦。