我了解飢餓，因為我自己都係活在飢餓中！我生於肥胖家庭，父母「三高」，心臟糖尿病齊全，不戒口節食很容易三長兩短；女兒自出娘胎就從未瘦過，在超標中長大；兒子每日返學連活動，坐立不安十多小時；一家人都被迫揀飲擇食，總活在飢餓之中。我是個專心減肥人士，我很了解飢餓苦況。
講起我的減肥血淚史，實在聞者心酸見者流淚，眼白白見朱門酒肉擺到臭都不能食，偏偏要啃路邊凍死骨，你們講句公道話，即使不折墮都挺夠折騰的是不是？為人父母，餵飽子女是天職，只因女兒天生肥胖，樣子不夠標青就話有得整可以補救，胸唔夠大就話可以僭建，身材不夠好肥腫難分好惡搞喎，他朝點做「𡃁模」點選美點做得成明星點嫁入豪門做億萬新抱呀？天生饞嘴偏要忍口天生肥胖偏要減食，睇得唔食得有幾飢餓你們知不知？我兒子從不會讀死書，是個天生運動狂，堅持日夜打機操練網上各種運動，又更好學孜孜不倦操練角色戰術運用，為此全情投入廢寢忘餐全神貫注，根本完全忘記有食飯這回事，打個天昏地暗一粒米都冇到過肚，可以有幾飢餓你們知不知？你們不知，但我親歷其境有切膚之痛，我怎會不了解飢餓苦況？
我知一定有人罵我卑鄙無恥賤格下價橙，在此趁早教定大家罵人都要罵得有水準一點，人云亦云「何不食肉糜」係完全不恰當係錯嘅！不要講食肉糜，粥水雖然頂唔到餓，最少會有一下子的頂住個胃的充實感覺，要連粥水都冇啖飲先真正有資格叫做飢餓！奉勸大家身在福中要知福，不要辜負我一片苦心，學Steve Jobs話齋，Stay Hungry, Stay Foolish呀！
張慧敏
http://www.facebook.com/HKcareerdoctor