港股上星期四急升後，星期五出現回吐，但兩會概念股繼續喪炒，其他強勢板塊又梅花間竹衝過，睇嚟𠵱家stock pick能力相當重要，揀股揀得好、低位買得早，可能逆市有得賺，升市更加唔使講。
至於當炒嘅兩會概念股，近排遲一日買股價已一放絕塵，勝算亦大減，去到呢個moment，閣下冇強勢股喺手，就可能要同自己講句「下轉請早！」候低再買過。
內地空氣污染嚴重，市場預計兩會後中央會搞搞佢，刺激環保股近期一籃子爆升，裡面包括水業股，總之個樣似環保嘅都升餐死，基本因素係咪隻隻好，晉佳絕對有保留，呢個板塊亂炒一通，相信遲早會有調整。
至於1月尾已經推介過嘅東江環保（895），股價一個月升咗25%，罕有地波幅擴大，多番成交。事實上，晉佳推介呢隻股後，𠵱家已經到晒目標價45蚊有凸，如果有貨未沽，不妨繼續揸；若然未有貨，仍然可以分段吸嚟長揸。
有機會升上60蚊
講番業務，東江環保主要從事工業廢物處理、加工，其中含鋼廢物經處理可變成貴金屬，處理含銅廢物仲可生產硫酸銅、硫酸鎳、氧化銅等。
如果將工業廢物當普通垃圾處理，會對空氣、土壤同水構成嚴重污染，所以東江環保業務對於改善空氣質素都有間接幫助。
晉佳始終認為，東江係環保板塊裡面最實在嘅選擇，畢竟股價re-rating之後，開始有鑊氣，里程斷估冇咁快完，睇個勢係向住增長股進發，咁就唔同講法，唔使睇45蚊咁保守，預測市盈率可睇20倍。
之前東江環保發咗盈喜，預料舊年全年淨利潤增長30%至45%，介乎2.64億至2.94億元人民幣。如果以舊年最低嘅盈利預測推算，全年每股盈利就有2.36港元，歷史市盈率估計20倍左右；如果係用最高嘅2.94億元人民幣計，市盈率18倍。略為保守計，當𠵱家歷史市盈率18至19倍，炒上23倍，就變咗60蚊，可以吼調整再買啲。
晉佳
本欄逢周一、三及五刊出