香港嘅左派喺北京面前，永遠聽教聽話，只要阿爺手指一揮，過街老鼠都可以講成達官貴人。極有機會成為政協常委嘅唐英年，近日獲左派大讚點樣愛國愛港、夠晒資格，但如果記得「去年今日」，唐英年喺特首選舉論壇，因大爆梁振英醜聞而遭左派群起而攻之，世態炎涼，莫過於此。
唐唐繼續爆金句
話說唐英年當日爆大鑊，指狼振英曾經喺行會話要出動防暴隊鎮壓反二十三條示威者、又提出縮短商台牌照打壓商台言論，左派報章即時棒打唐唐，當日《文匯報》更出動到社論，不點名批唐唐「親者痛仇者快」，仲連唐家都鬧埋，話佢有辱唐家歷史，愧對人民，有親北京嘅報章評論，更指唐唐放棄君子之爭，與反中亂港嘅勢力眉來眼去。其後各個左派名人出來批評唐唐爆大鑊點樣唔啱規矩，八方真係寫都寫唔晒。
事隔一年，今日唐唐將成為政協常委，左派好似失憶咁，完全唔記得當日點鬧唐唐。禮義廉主席譚耀宗大讚唐唐「好有能力」、全國政協常委陳永棋同港區政協委員胡經昌就大讚唐唐「實至名歸」。昔日批評唐唐嘅報章亦全部封口，冇再提番當年爆狼振英大鑊嘅事。
不過，唐唐可能早已睇慣左派呢種善變，冇同呢班人計較，寧願醉心炮製金句，就好似佢噚日喺北京被記者問到做咗政協委常會有乜嘢提案，唐唐就回應話：「我遲吓會提案，會提出一啲提案。」佢想講乜嘢呢？怕且得佢自己明。
mailto:[email protected]