同人唔同命，紐約周一同樣進行世界網球日「網球名將交鋒」表演賽，戲碼就勁過香港呢邊好多，除咗世界1、2姐「細威」莎蓮娜同艾莎倫嘉外；仲有噚日新鮮出爐嘅墨西哥公開賽冠軍拿度，傷癒復出嘅佢只花咗65分鐘，就以6:0、6:2擊敗西班牙同鄉費利，贏波後戴上傳統墨西哥帽，都幾趣怪。
因左膝傷停戰7個幾月嘅拿度，喺上月復出後參加3個比賽，贏2輸1，算係有個好開始，26歲嘅佢噚日喺墨西哥封王後話：「過去受傷打唔到比賽嘅日子真係好難頂，好多謝每個喺我康復期間支持我嘅家人及朋友。」
拿度紐約鬥迪樸度
世界排名第5嘅拿度總算度過黑暗期，周一仲現身紐約麥迪遜廣場參加表演賽，同迪樸度較量，佢話：「費達拿以前都打過呢個表演賽，佢同我講係好難得嘅賽事，尤其我舊年因為受傷打唔到美國公開賽，今次算係補番數，可以同美國球迷見面；雖然係表演賽，但都想有個好show送畀球迷睇，希望球迷好好享受啦！」