【EXPLORER】
一個是香港大學微生物學系教授，一個是食物及衞生局局長；袁國勇極少在實驗室以外的地方接受訪問，高永文自上任局長後亦鮮有談及工作以外的話題，二人頻密同場亮相，已經是十年前沙士一役了。兩個都是皇仁書院舊生，因為加入天文學會展開四十多年的友誼，這次老友聚頭不為沙士，只為星星，緬懷昔日觀星的日子。
記者：黃子配 攝影：羅君豪 黃偉傑
高永文和袁國勇自中三開始就是同班同學，二人都是行山愛好者，不時相約行山，整個港島的山都幾乎被他們走遍了。二人的友誼由天文這興趣牽線，初中就加入皇仁書院的天文學會，為了觀星，曾一起在星空下捱過無數個通宵。
高永文也是資深觀鳥迷，當上局長後，工作繁重得連最喜歡的觀鳥比賽也無暇參與，這次訪問約定在星期日進行，高永文也夾硬抽出一小時匆匆趕回皇仁。他一抵達，就熟悉地沿着天文房的小樓梯走到天台，二人在這個滿載回憶的天台緬懷一番，高永文驚嘆：「嘩，角落那棵木棉樹靚過以前好多！」「𠵱家周圍起晒樓，同以前唔同晒，以前呢度睇星好靚㗎！」「𠵱家學校連天文台都有，真係幸福。」他倆一看見師弟們現時常用的折射式望遠鏡，立刻上前仔細研究一番，不斷詢問製作過程及材料細節，同時又開始想當年，袁國勇說：「以前我哋周圍搵鐵皮做鏡筒，放學又會走去將軍澳爛船廠執人哋唔要啲玻璃番嚟慢慢磨。」
皇仁書院的天文學會極威水，由廖慶齊一手創立，他曾是皇仁的副校長，亦是香港太空館首任館長，更是世界著名的業餘天文學家，本身任教文學及歷史的他，對天文有極濃厚興趣，1961年在皇仁成立了全港第一個中學的天文學會，袁國勇當年也是因為他才加入天文學會，「廖副校長在上水的村屋設立了全港第一個私人天文台，他那時邀請我們去參觀，他的屋有個用金屬造的斜天花，可用電控郁動，又自己造了一支口徑12吋半的望遠鏡，支軸足足有兩個人咁長，好犀利！」高永文加入原因也近似，「我曾經miss了一件很重要的天文大事，就是1965年的池谷－關彗星，應該是繼哈雷彗星後最壯觀的，這大大引起我對天文的興趣。而且皇仁天文學會有好耐歷史，係個heritage。」
「望遠鏡全部自己整，以前啲人幾叻！」
凡是天文學會會員都有一項拿手好戲，就是「磨玻璃」，從前資源有限，買一台望遠鏡價值不菲，學生想觀星就惟有靠自己造，高永文說：「玻璃係去爛船廠執番嚟，再用鋼砂磨，磨一塊鏡起碼要年半，通常要幾屆先完成，我哋當年嗰塊好似磨了足足三年！」袁國勇也說：「最過癮係搵焦點距離，其實磨鏡係好好嘅訓練，因為過程要好用心好專注，嗰時真係一放學就走上天台磨㗎。」高永文又說：「大家會分工合作，有些磨玻璃、有些打鐵筒、有些構思機械部份，全部一手一腳自己整，所以話以前啲人真係幾叻！」
以前每逢星期五晚還有一個「天文學者之夜」，放學後就大夥兒齊齊走上天台等到天黑觀星，下午3時放學，在學校逗留至三更半夜是等閒事，高永文笑言：「有時就會返屋企食飯先，食完又走番學校，好天就睇星，唔好天就『講書』，閒話家常，或者辯論下一些天文話題。」曾是學會會長的他，跟同屆副會長袁國勇辦過不少觀星活動，「試過入赤柱聖士提反睇星，一大班人瞓喺個大草地睇通宵！又會去西貢book個campsite搞觀星營，大家落手落腳煮完大鑊飯就等睇星。」
袁國勇的童年夢想是要當個太空人，喜愛研究宇宙論的他，中四時就已經用英文寫了一份長達三頁紙、關於太陽黑子的文章，發表在校內天文學會刊物《星空》，高永文都擔任過幾年的刊物編輯委員，既然大家都熱愛天文，大學時為何又不選擇相關的物理系、而同樣選擇了讀醫？兩人不約而同說了這番話：「有時喜歡一樣事物不一定要全身投入在內，就好像廖慶齊副校長只是個業餘天文學家，但他一樣很有成就，把天文當作是興趣反而有更大發揮和創造。」
「原來高局長咁膚淺！」
二人平時在鏡頭面前嚴肅，在鏡頭背後卻甚風趣，每當說起從前的種種趣事，更不時互「窒」，高永文說自己雖然大學讀醫，但亦繼續活躍於天文活動，更和朋友們夾份買過一支望遠鏡，袁國勇突然插嘴問：「話時話，支鏡𠵱家去咗邊？」高永文說：「唔見咗啦！」袁國勇作狀找晦氣：「喂！有冇搞錯？成萬幾二萬蚊，我有份夾錢㗎！」談及研究天文的最大樂趣，高永文說：「我鍾意嘅原因好膚淺，就係鍾意發掘一些肉眼看不到的星體，自己可以辨認到不同的星體，例如這顆是北斗，那顆是冥王，根據星圖搵到啲星就會好開心。」袁國勇又挖苦：「原來高局長係咁膚淺嘅！」那他自己喜歡的原因又是甚麼？「我當支望遠鏡係顯微鏡咁睇囉！」話未說完，高永文又模仿他：「咦？沙士？」逗得眾人哈哈大笑，袁國勇續說：「宇宙有太多嘢唔知，例如宇宙起源、終結、痕迹，充滿神秘感，好過癮！其實天文同病毒學都有好大關係！」高永文又再揶揄：「所以你咪做到教授囉！」
訪問過了一小時，高永文就要離開趕往下一場，正當眾人打算離開之際，袁國勇突然對現屆天文學會成員師弟說：「𠵱家皇仁附近太多光害，根本唔適合觀星，我知道大潭有個地方好適合，𠵱家就車你哋去睇。」師弟們還來不及反應，他就說：「我好心急，一諗到就要做，唔好浪費時間。」眾人立刻乖乖登上他的座駕，驅車前往大潭，抵達大潭一片空地，他拍拍師弟膊頭說：「我好鼓勵你哋向學校爭取改為在這裏觀星，如果將來要幫忙要經費即管出聲，我同高永文一定會支持！」他對記者說：「其實我一向都不做這類型的訪問，今次是有關皇仁才會答應，幸好總算對天文學會發展有幫助。」記者當然明白，得教授、局長撥冗的不是敝報，而是皇仁書院、老友份上還有天上星宿。
皇仁書院天文學會威水史
去年慶祝創校150年的皇仁書院，1961年由前任副校長、太空館首任館長廖慶齊創立了全港首個中學的天文學會，廖慶齊是著名業餘天文學家，1972年在上水的家設置了全港第一間私人天文台，其天文台更登上美國著名天文雜誌《Sky & Telescope》1974年4月號的封面。
沈祖堯、湯家驊、香港天文台前高級科學主任李偉才、香港科幻迷潘昭強等多位名人都曾是皇仁書院天文學會成員，學會現任負責老師陳玉麟亦是天文發燒友，曾自製多支望遠鏡，是聞名的磨鏡高手，外號「鏡神」。2006年就曾帶領廿多個皇仁學生花4,000多元，以一年多時間製造一支口徑達30吋，全亞洲第二大的巨型望遠鏡，可看到30億光年以外的星體，足以媲美香港天文台的望遠鏡。