有信心今個月底攞到個免費電視牌照嘅香港電視主席魔童王維基（上圖），等個牌等到頸都長，上星期出席自由黨活動時，大呻自己每日都係燒緊銀紙，「我每日要使100萬！」佢話，等咗三年零四個月，每日都過得相當緊湊，打算日後將呢次過程結集成書：「我專登請一個同事返嚟，就係日日幫我寫日記，呢本日記係好精采。」
魔童話，如果要生活安穩，佢大可以搞番電訊，就可以過埋下半世，𠵱家搞電視，係由零開始：「我覺得人生係要過嘅，我都希望大家去過一啲過癮嘅生活，生活唔好戇戇居居。」佢仲話，日後呢本回憶錄會大談，昔日同佢喺亞視大鬥法嘅張永霖點解係佢恩人㖭，仲話冇張永霖，冇今日嘅王維基喎！