【台北】台灣帥哥彭于晏近年密密拍，佢喺電影《翻滾吧！阿信》大騷健碩身材，早前又喺《寒戰》扮警察，鏡頭前盡展英氣，佢近排為咗拍攝林超賢執導嘅新片《激戰》，又進行地獄式特訓，日日狂健身同練拳，兩樣加埋接近6到8粒鐘，同時又戒食油膩食物，佢好快就練咗雞扒胸同六嚿腹肌，有咁弗嘅身形當然好自豪要騷哥利，月底就31歲牛一嘅佢日前赤膊接受雜誌訪問，大擺型甫。影完呢輯大隻仔相，彭于晏就可破食戒，佢得戚話：「我今天就要狂吃。」
豪邁真性情
不過鏡頭前嘅猛男，背後不自覺展示率性一面，彭于晏日前喺台北拍飲品廣告，有指佢呢次仲係搶阮經天飯碗，其間彭于晏就唔覺意流露咗自己嘅豪邁習慣，佢用手指撩鼻採礦，一指神功插入鼻窿仲插得好入，睇見都咪話唔嚇窒粉絲，仲當眾擘大口打瞌睡。彭于晏鏡頭前後兩個樣，形象差天共地，對比好大，所以幾時都話藝人形象好緊要。
撰文：丁寧
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/