鬍鬚曾上個禮拜為中產落咗個新定義，話中產都鍾意「飲咖啡同睇法國電影」，咖啡店星巴克（Starbucks）唔知係有心定係冇意，前日開始推出優惠，市民只要憑2月14日至3月31日嘅任何電影票尾，到旺角洗衣街星巴克買杯中杯咖啡，就可以獲買一送一，優惠至本月31日。嘩，財爺嘅水都抽，星巴克，好大的膽。好多網友都懷疑星巴克一心寸爆鬍鬚曾，有人問：「使唔使一定要法國電影？」有網民就仲寸嘴，話星巴克幫戲迷榮升中產，因為要做中產，兩者缺一不可。有啲人就話：「係中產嘅話就冇需要貪圖埋買一送一嘅優惠啦！」