恒生銀行（011）噚日八十大壽，恒生由最初只得11名員工，發展到𠵱家有1萬人，客戶數目超過300萬，認真唔簡單。為答謝同事，恒生特別訂製咗用招牌財神做主題嘅「財神紀念八達通」套裝，內附80蚊面值，人人有份。唔知今日恒生公佈業績，會唔會增加派息或派特別息答謝股東呢？
除咗紀念八達通，恒生仲會向每名員工發放相等於1,000蚊嘅「特別團隊津貼」，話明係團隊津貼，就唔係齋現金落袋，而係要求各部門同事一齊消費享用，可以食餐勁、搞聯誼活動或者短途外遊都得，旨在建立團隊精神。
慶祝活動嘅高潮要等到5月，恒生計劃好似慶祝75周年咁，喺會展搞個大型酒會，到時必然冠蓋雲集。聽聞，政務司司長林鄭月娥將會擔任主禮嘉賓。