賓尼迪斯話晒有頭有面，上周突然「發爛渣」，鬧球迷鬧班主兼劈炮。可能肥賓自覺上任後被過橋抽板，以為坐正，點知做咗看守領隊；仲聞到「恩將仇報」味，又被球迷日鬧夜鬧，於是鳴槍示警！頗有幾分尖啤上身感覺。
車迷想佢即刻走
可惜呢位「英超尖啤」自爆的威力，遠不及港版尖啤震撼。我們的尖啤坐擁大量黑材料，繪形繪聲指控「老闆」講大話；英超尖啤跟咗油王幾個月，點都應該有啲好料在手啩？例如錄音證明油王應承佢做正印領隊，點知講大話；最直接，梗係摷油王屋企張圖則出嚟，踢爆佢間豪宅有僭建啦！可惜肥賓非測量界出身，現在睇怕快要「量地」就真。
賓帥「發爛渣」，在英國引起頗大迴響。尤其一向睇佢唔順眼的車仔球迷，更火上加油。英國廣播公司節目中，車迷紛紛致電炮轟。主持問：「你們對肥賓恨之入骨，現在他季尾走人，豈非如願以償？」球迷卻認為賓帥竟將戰績平平的責任推在球迷身上，是不負責任；這樣「發爛渣」劈炮，更覺他不尊重球迷以至球會。現在球迷不滿已經升級，季尾都嫌耐，要肥賓立即人頭落地至肯收科。
其實肥賓應該學下本港嘅「最高領導」，面對挑釁橫額，批評言語，一於擰轉背，「哈！哈！哈！」大笑3聲了事，捱到任期屆滿先卸任，先叫道行高。
英國媒體已推測肥賓經此一罵，可能隨時食無情雞。其實車仔近期戰績，聯賽輸畀曼城仍穩坐前3，兩盃賽又能晉級，唔算好差。咁都EQ失控，會否反映佢已信心盡失，足總盃8強對曼聯都自知凶多吉少？
方柏翹
now足球評述員