新世界發展（017）聯席總經理鄭志剛（Adrian）出名鍾意親力親為，勤力到不得了，勤力當然有回報，佢升做呢個位一年，竟然唔經唔覺減走17磅，但佢點都唔肯透露𠵱家幾重，原來體重係佢嘅秘密。
Adrian話，原以為自己已經好忙，升做呢個位先知乜嘢叫做忙，不停周圍飛係常態；半夜三更，同事嘅電郵都係排山倒海咁來，真係少啲精力都唔掂。難怪佢唔使做運動都減到磅。
講開又講，新世界最近為慶祝40周年，推出一本紀念特刊，裏面有張陳年黑白相，創辦人鄭裕彤俊朗不凡，Adrian阿爸鄭家純就官仔骨骨。望落Adrian同純官後生嗰陣有九成似，就連Adrian都話係。咁怕唔怕將來連身形都似埋呢？佢笑而不答。