唔少香港人都鍾意去車公廟拜神，轉轉風車希望行好運。丹麥前「水貨1姐」禾絲妮雅琪今晚就會同波蘭嘅拉雲絲卡，喺機場亞洲博覽館打「網球名將交鋒」表演賽。禾琪喺上星期嘅大馬公開賽首圈就下馬，一向鍾意嚟香港嘅佢重臨「福地」，唔知會唔會幫到佢轉運，喺之後比賽反彈呢？（now636及660台今日7:30pm直播）
娜姐甩底明年補飛
雖然澳網女單亞軍、中國「金花」李娜腳傷仲未好番，上個禮拜宣佈退出，由波蘭嘅拉雲絲卡補上，但門票銷售似乎冇受影響；賽會發言人所羅門（Jerry Solomon）話，目前已經賣出咗4,800張飛，有信心全場6,400個座位爆滿，波飛即場有得賣。
所羅門亦帶嚟另一個好消息：「『網球名將交鋒』鐵定出年3月3日喺香港再辦，地點未定，不過李娜話出年一定會打，因為佢都好掛住香港。」可惜「娜姐」因傷未癒再退出星期三展開嘅美國印第安韋爾斯賽，喺度都祝佢快啲好番。
講番今晚場波，4位球手禾琪、拉雲絲卡、蘭度同麥根萊已經抵港，噚日仲喺博覽館練波，「丹麥甜心」自從前年失去「1姐」寶座後，成績係咁跌，𠵱家只排第10，上星期仲喺大馬公開賽第1圈，輸畀中國小將王薔出局，真係幾辳吓，我哋都希望佢喺香港轉運！
猛話鍾意香港「福地」
嚟過香港好多次嘅佢，上星期六仲喺twitter上載咗張維港夜景相，大讚香港迷人夜景；今晚佢會對舊年溫網亞軍拉雲絲卡，兩人交手9次，禾琪贏過5次，不過對上3次都係對方贏晒。早喺07年， 只得17歲嘅禾琪就喺維園打表演賽，亦唔止一次話鍾意香港，仲好想上山頂㖭；而佢上星期六晚就低調去咗尖沙嘴行街。希望佢係呢笪「福地」爭氣，重拾番信心啦！
賽會噚日就係赤柱搞咗個網球訓練班，有200位小朋友參加，但4位球手因為太忙去唔到。其實，好多人想知點解表演賽喺星期一舉行，事關今日係「世界網球日」，以慶祝國際網球聯會（ITF）成立100周年，唔止香港同紐約，世界各地今日都會有好多推廣活動，鼓勵多啲人接觸網球。