民建聯嘅英文水平，向來令唔少後生仔明白讀好英文係幾咁緊要，否則只會笑死街坊。噚日民記夥拍一個年輕組織「八九點」，公佈後生仔嘅利是錢會點用嘅調查，八九點主席叫做葉文斌，查實都係禮義廉青年成員一名，明顯只係想用呢個組織突圍一下。
八九點英文名叫做tm2s，葉文斌話自己唔記得代表乜嘢，查完一大輪，先至知道係代表「Tuen Mun Morning Star」。組織有幾多人、有乜嘢人、架構係點，一律「無可奉告」。「八九」呢兩個字向來都係搭住「六四」，但葉文斌話，叫「八九點」其實係代表年輕人：「因為年輕人代表活力，八九點起身，而年輕人經常都係好晏返屋企，通常都八九點」。Well，用八九點嚟代表年輕人，真係唔該晒。