思捷（330）原本打算舊年6月底搞「投資者日」，帶團去德國總壇睇舖，但臨時取消，冇耐CEO范德施仲辭埋職。難得新CEO馬浩思記得呢個德國之約，決定今年5月14號再喺德國搞投資者日，可惜分析員唔多恨去。
有分析員老友狂呻，投行「咳筆直」咳到癲，「限飯令」（唔准同客去五星級酒店食飯）、「限飛令」（減少出差次數）層出不窮，要公司批准佢飛德國睇舖，難過撲曼聯飛！
最重要係，思捷未擺脫困境，分析員好難寫報告叫客買，投行花錢畀佢哋去德國，返來冇古仔做推銷，做唔到生意，點交差？
另一位分析員慨嘆，思捷喺潘祖明做CFO嘅時候首次帶團去德國，公司當時處於增長神話中，分析員反應非常熱烈，有份去嘅人與有榮焉，如今惟有講句此一時，彼一時。