翠華控股（1314）上年短短三個月狂升67%，估值同奶油豬價錢一樣嚇人：截至9月底半年，公司純利6,478萬銀，全年樂觀當賺1.5億元，2012年預測PE達35倍；今年當再多賺三成，預測PE仲有27倍。唔少人問，佢憑乜值呢個價錢？魏力都答唔到，所以未曾買過。有隻餐飲股都係高增長，但trade緊10倍預測PE，你又會唔會考慮？佢就係佳景集團（703）。
佳景呢個品牌可能比較陌生，但如各位有過大海玩，應該幫襯過。公司去年於澳門經營約40家中、日、西式餐廳及美食廣場，主要開設於賭場，並取得Pacific Coffee的澳門經營權，光大證券預測，今年分店數目將增至47家。
翠華經營模式「一味靠快」，但佳景就高中低檔餐飲生意齊備，高檔日式餐廳平均單價近千元，美食廣場都成百元，純利率19.2%，比翠華的13.3%更高。
阿爺將澳門定位為國際旅遊及消閒中心，未來氹仔有多家酒店及賭場落成，2017年底前，預料新增房間大增七成至二萬間，餐飲業大有可為。
此外，佳景既可受惠濠賭業高增長，估值又比濠賭股平一大截，保守當全年賺1.2億元，現價PE僅10倍，比翠華平太多。目標睇3蚊，PE只係14倍。
http://www.facebook.com/2012jason
魏力