有時真係唔想長他人志氣，但無奈香港嗰班同人一樣咁高薪厚職嘅官員，就係交唔出人哋嗰啲有諗法、有「嘩」點嘅功課，即係派糖，都要係「爆炸糖」囉。曾幾何時彼此都是亞洲小龍，今日港府除了假虎威風都唔知仲有乜嘢可示人。亦難怪新加坡總理李顯龍，喺佢嗰份財政預算案內揶揄港人近年的收入增長只及星人一半，又說該國嘅生產力早超香港，財爺聽了不知有何反應。
財爺嗰份預算案了無新意，自家人都興趣索然，但係人家那份就亮點處處，而最恨死港人嘅應該就係最新推出的「加薪補貼計劃」（加補），變相資助全國一般受薪階層加人工。凡月入4,000坡紙（約2.5萬港元）或以下僱員，若獲僱主加薪，政府便會分擔其中40%，為期三年。以該國去年工資中位數3,000幾坡紙為例，此計劃已然覆蓋中低階層約七成勞動人口，總開支約225億港元。
高官廢噏 「加補」唔使諗
用我司去年薪調為例，因為員工平均月薪都真係有成2.5萬銀，而加薪幅度約4.5%，即係月加1,125蚊，政府就會負擔其中450蚊，一年就係5,400蚊（同前年嘅6,000蚊相若），三年就係1.62萬銀。不過若然政府真有此德政，我又何妨錦上添加！因為就算將加薪幅度調升到7%，公司總支出仍會低過原有預算，而員工當然就係最大受惠者……各位同事，夢醒啦。
皆因我哋啲高（薪中產）官只會噏埋啲乜嘢本港一向奉行自由開放嘅經濟制度，政府唔應該插手干預勞工市場運作嘅廢話，雖則「最低工資」已然落實，接踵而至的還有「標準工時」，而有時限性的「加補」，起碼不會挑起勞資矛盾，且受惠者皆是就業人口，勞而有獲亦唔會惹來養懶人的非議，何樂不為？當然官員又會滿臉難色咁解說，執行上有好多考慮，行政上有諸多掣肘，係囉，你哋加親嘅人工百分百都係公帑，對於比例較少的安排難免入手無從。
不如容我大膽建議，如果政府嘅「加補」未能成事，相應嘅幅度將會由各位高官嘅薪津調整中扣減，我相信各位一定竭盡所能，玉成其事。至於會不會有老闆夥計串通合謀搵政府着數？如何把關自是後話，呢幾年勞資關係動輒劍拔弩張，若彼此同氣相求，有何不好？況且新政府又憑乜嘢同人講誠信，再加上咁多年政府「走咗市民嘅數」，都唔該擺低少少利息呀。
盧先亞