當打工仔為「復活」3月終於到來而歡天喜地，中環友卻未必笑得出，皆因覓食地方又少一個。置地的ThreeSixty上周四關門大吉，雖然兩者同屬怡和集團，但在這個銀紙滿瀉的時代，每塊階磚皆有價，只有闊太嘆下午茶的Cafe Landmark可以留低。Samantha大膽假設，若租金再升，美食廣場將成歷史。
最近一次幫襯美食廣場，端來的豬扒有如遭冷落的佳麗，「體溫」接近隔籬杯凍檸茶，而個餐盛惠40大元。你投訴嗎？恐怕阿姐會回你一句：小姐，40蚊貨仔，係咁㗎喇！你只有吹脹，但駁唔到。
本港的美食廣場多位處於大型商場內，物價人工租金樣樣升，雖然質素鬥唔贏三哥碗米線，但焗住加價，以廉價做賣點只會加速滅亡。在量寬下，難道容不下廉價美食？又唔係噃，新加坡可以開懷舊路邊攤，有水準之餘價錢亦合理，在商業區的老巴剎，熟食市場屹立了40年仍健在。
香港點解冇路邊攤？或者歷任特首唔鍾意食啩。
Samantha
本欄逢周一、三、五刊出