林峯19日內同女友吳千語去三個地方旅行享受完二人世界後，噚日佢復工到馬鞍山出席簽唱會，雖然已名草有主，但依然有幾百fans支持，林峯又唱又跳又同fans玩遊戲狂冧補數。馮仁昭學千語BB叫林峯做阿文（真名林匯文），林峯笑話：「屋企人咁叫我。」已視千語BB係屋企人？佢唔避忌點頭。幾次旅行都開心？林峯甜笑認好開心，仲話同女友相處多咗更了解對方。
怕提同房瞓
最近千語BB踢爆林峯成日遲到，但噚日林峯出奇準時，係咪聽BB話改過？佢話：「係呀，其實一路改緊，我都唔係好嚴重。」係咪受BB影響？佢話：「好正常，兩個人互相影響，令大家更好。」咁同千語BB旅行係咪同房瞓、怕唔怕搞出人命？係咪豪花50萬包起旅費？林峯尷尬話：「呢啲私人嘢唔講。」之後仲緊張到流晒汗話：「開心嘢，多謝大家祝福，不過我流汗係頭先跳舞咋。」
係咪視千語BB為結婚對象？林峯坦認：「一定好認真。」另外對於曾喺劇集《摘星之旅》合作嘅27歲內地演員宋汶霏噚日因癌病去世，林峯話好可惜。
撰文：馮仁昭
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/