財爺一句「我都係中產」，掀起全城熱烈討論，維基百科將此金句加入曾俊華簡介，反而每次財政預算案計錯數卻隻字不提，就知今次事件迴響幾大。平時愛玩candy crush、睇星爺無厘頭電影嘅唐牛，對財爺「中產論」見怪不怪，事關佢一向不知民間疾苦，否則當年點會有向強積金注資6,000元嘅高智提議，之後仲俾建制派騎劫，焗住派錢。
主要產銷智能手機、手提電腦及電器外殼嘅通達集團（698），下周三（13日）放榜，同業巨騰（3336）已發盈喜，通達業績值得睇高一線。截至去年6月底，通達半年賺1.1億銀，按年增長11%，專注發展高利潤產品後，成功推高毛利率近4個百分點至22.1%。集團客戶群包括三星、華為、聯想及諾基亞等，成功食正科技熱。通達上周五收報0.55元，跌1.8%，日線圖已行至三角形末端，不排除趁放榜在即爆邊，彭博綜合券商預測，今年預測PE僅8.5倍，先以10倍PE作目標，可見0.65元，潛在升幅18%。
唐牛