【家世顯赫】
出生在「澳門三大家族」的何敬豐，除了祖父、叔父及父親都是公眾名人外，不說不知，原來他的姨媽同屬大人物，就是六十年代的影迷公主陳寶珠。有着名門望族的家世背景，他不諱言為他的人生帶來比一般人更多優勢，但卻同時感到在享受優勢的背後，要負上的壓力也重於平常人。
「衰咗係成個家族」
在「何氏」祖宗響噹噹的名聲庇蔭下，何敬豐自出娘胎已注定「贏在起跑線上」，「優勢一定有……譬如我屋企起碼幫我供書教學，我老竇成日都話屋企唔使你養，第日都唔使你養屋企，你讀幾多我畀幾多。我起碼唔使好似中學、大學啲朋友咁，為咗買書簿要出去做麥當勞要幫人補習，我都有幫人補習，但只係為搵多啲pocket money（零用錢）畀自己使。」
而在弱肉強食的社會中工作，「何氏」的光環亦令他更易生存，「做工有冇優勢？一定有！好似見客咁，好多時可能唔會見我，我係德銀V.P.（副總裁）又點，大把M.D.（董事總經理）嚟搵我，點解要見我？就係因為我姓何，可能佢會畀個面見我。」就算是現時擔任北京市政協委員的職位，他亦不諱言是家族帶給他，「係，一定係（因家族關係）！雖然我都係專業人士，可能可以專業人士嘅渠道上到政協，但好多人都係，輪唔輪到我呀？」
因為姓何，令何敬豐做事更易事半功倍，但背後所要承擔的責任卻較其他人更多，「我揹住姓何，我衰咗係成個家族，我做得好唔好，做咗啲乜嘢，啲人點都會link返去我阿叔、老竇同阿爺度，要背負住嘅係家族嘅壓力。」