應屆港姐冠軍張名雅被拍得與舞蹈藝員拍拖，更任由男友當街撩大髀，本報昨日收到讀者報料，踢爆其舞蹈藝員男友名叫陳俊堅，在張名雅參選港姐時認識，當時陳俊堅已有一名拍拖多年的女友，港姐冠軍即時變小三，但張名雅昨日出席活動時例牌否認在蜜運中。
現年25歲的張名雅在溫哥華與宅男男友分手後，回流返港參選港姐，估不到演藝事業尚未起步，卻被拍得與舞蹈藝員拍拖，還在鬧市蹺手撩大髀。昨日有讀者爆料，指與張名雅蜜運的舞蹈藝員名叫陳俊堅，與張名雅在港姐競選時合作而撻着，當時陳俊堅已有一名拍拖多年的女友，但因張名雅介入，故跟女友數月前分手。
蹺手死撐腳傷
雖然被踢爆做了小三，但張名雅前晚與其他港姐以性感裝束出席東華活動，昨午她又到灣仔伊館錄影體育節開幕典禮，席間她依然否認與陳俊堅拍拖，她說：「佢唔係我男友，係我舞蹈老師，之前已經認識，華姐才藝表演時我搵佢同另外一個女舞蹈員排舞，因為華姐有好成績，想答謝佢哋，諗住三個人食飯，但女仔唔得閒。」
至於陳俊堅撩她大髀，張名雅謂有看過片段，她說：「當時着咗褸feel唔到，如feel到會彈開。」男方是否對自己有意？張名雅說：「唔係，當時我睇緊訊息，佢提醒我過馬路啫，我都有問番佢撩我大髀，佢話提我過馬路。」但為何蹺住阿堅的手？張名雅繼續撐說：「新年春晚我拗柴隻腳腫咗，蹺佢嚟借力，我知佢唔介意。」她強調沒想過有否發展機會，因只會專注事業。
活動後，被指小三的張名雅坦言與陳俊堅確是選港姐時認識，至選華姐時才熟絡，她說：「我哋冇提過私生活，唔知佢有冇女友，因為唔知，所以唔會介意被誤會係第三者。」
另外，同場的王梓軒曾被指其任藝發局主席的爸爸王英偉用公帑為他谷個唱，他否認其事，並謂會盡量不做藝發局活動來避嫌。
採訪：黃曉妍、盧妹
攝影：陳志嵐、黃文偉
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/