【中環】最近同筍盤馬國明傳拍拖三個月嘅唐詩詠急急否認緋聞，梗係啦，根本上佢同崔建邦嘅感情好穩定，而且仲鬼咁夾㖭，好似都有鋪犯交通規例癮咁，之前崔建邦試過醉駕被罰停牌，又喺停牌期間揸車，連環犯規，女友唐詩詠都一樣，一晚俾人抄兩張牛肉乾。
行車證過期
前晚11點幾，唐詩詠架白色甲蟲車停咗喺中環蘇豪區，已經因為違例泊車抄咗張牛肉乾，而另一張，原來係因為行車證過咗期，詩詠座駕行車證係到上個月8號，過咗期足足三個星期，唔通詩詠呢排掛住應付啲緋聞男友，唔得閒續期？
大約11點50分，詩詠同谷德昭女友林子萱齊齊食完飯返嚟攞車，見到有兩張牛肉乾，詩詠無奈一笑置之，反而係林子萱忍唔住話：「嘩！咁多張？」
採訪、攝影：梁繼光、吳耀輝、楊浩賢
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/