景順早前宣佈推出人民幣債券基金，表面上僱員又多一個投資選擇，卻同時道出強積金投資渠道狹窄的悲歌。強積金目前只有股票、債券及貨幣三大資產類別可供選擇，而且只能買升，不能買跌。毛丘明白，退休金應講求長線增值，而且造淡風險可以無限，冇得買跌可以理解。
股票基金方面，大體上只有中港歐美日等成熟市場，所謂中國股票亦主要投資本港上市的中國股票，高增長嘅新興市場一律欠奉。債券基金重點是美國國庫債券及香港政府債券，高息、企業債唔使諗。貨幣方面唔係美元就是港元。其實，強積金只要增加多些投資瓣數，如REITs基金，畀僱員過下收租佬癮；高息股基金吸引好息一族；甚至黃金、石油基金等，必定可以令更多人關注自己嘅強積金。
魯毛丘